Nurab borayotgan Buxoro obidalari – nega hokimlik milliardlarni tarixiy imoratlar taʼmiriga emas, sunʼiy park uchun sarflashga bel bogʻlagan?


Saqlash
12:03 / 14.03.2024 1757 2

Buxoro viloyati hokimligi jamoatchilikning koʻplab noroziliklari, arxitektura xavflari, YuNESKOning ogohlantirishlariga qaramay, Buxoroda sayyohlar uchun tarixiy-etnografik park qurmoqda. Viloyat hokimi Botir Zaripov noroziliklarga javoban, ushbu loyiha sayyohlar uchun jozibador boʻlishi, ularning oqimini koʻpaytirishini aytib oʻtdi. Demak, loyihaning maqsadi Buxoroga turistlarni koʻproq jalb etish. Ammo ushbu yangi qurilishlar uchun milliardlab mablagʻ sarflanayotgan bir vaqtda sayyohlar uchun haqiqatdan ham qiziq boʻlgan, shaharning ming yillik tarixidan shohidlik beruvchi, oʻtmishdagi ulugʻvorlik va bilim ramzi boʻlib kelayotgan tarixiy obidalarning aksariyati yarim xaroba holatda ekaniga nima deysiz? Ular bir necha yillardan buyon tuganmas restavratsiyada yoki umuman eʼtiborda chetda qolgan. Oyina.uz Buxorodagi shu kabi qadimiy va qimmatli bir necha binolarning bugungi holati haqida foto-reportaj tayyorladi.

 

Abdulazizxon madrasasi

 

 

Ushbu inshoot 1651-1652 yillarda Ashtarxoniylar sulolasidan boʻlgan oʻzbek hukmdori Abdulazizxonning mablagʻi va farmoni bilan oʻsha vaqtdagi saroy meʼmori Muhammad Solih boshchiligida barpo etilgan. Oʻz zamonasidan buyon Abdulazizxon madrasasi oʻzining hashamati, badiiy bezaklarga boyligi jihatidan Buxoro obidalari orasida alohida oʻringa ega boʻlib kelgan. Ammo bugungi kunga kelib, bu bezaklar ohoridan ayrilib, nurab bormoqda.